Agar kaj-rau hain anjum asman tera hai ya mera
Mujhe fikr-e-jahan kyuun ho jahn tera hai ya mera
Agar hangama-ha-e-shauq se hai la-makan ḳhali
Khata kis ki hai ya rab la-makan tera hai ya mera
Use subh-e-azal inkar ki jurat hui kyunkar
Mujhe malum kya vo raz-dan tera hai ya mera
Mohammad bhi tira jibril bhi quran bhi tera
Magar ye harf-e-shirin tarjuman tera hai ya mera
Isi kaukab ki tabani se hai tera jahan raushan
Zaval-e-adam-e-ḳhaki ziyan terā hai ya mera
Aflak se aata hai nalon kā javab aḳhir
Karte hain ḳhitab aḳhir uthte hain hijab aḳhir
Ahval-e-mohabbat men kuchh farq nahin aisa
Soz o tab-o-tab avval soz o tab-o-tab aḳhir
Main tujh ko batata huun taqdir-e-umam kya hai
Shamshir-o-sinan avval taūs-o-raubab aḳhir
Mai-ḳhana-e-europe ke dastūr nirāle hai
Laate hain surur avval dete hai sharab aḳhir
Kya dabdaba-e-nadir kya shaukat-e-taimuri
Ho jaate hain sab daftar ġharq-e-mai-e-nab aḳhir
Khalvat ki ghadī guzri jalvat ki ghadi aai
Chhutne ko hai bijli se aġhosh-e-sahab aḳhir
Tha zabt bahut mushkil is sail-e-maani ka
Kah Daale qalandar ne asrar-e-kitab aḳhir
Alam-e-ab-o-ḳhak-o-bad sir-e-ayan hai tu ki mai
Vo jo nazar se hai nihan us ka jahan hai tu ki mai
Vo shab-e-dard-o-soz-o-Gam kahte hai zindagi jise
Us ki sahar hai tU ki mai us ki azaan hai tu ki mai
Kis ki numud ke liye shaam o sahar hain garm-e-sair
Shana-e-rozgar par bar-e-giran hai tu ki mai
Tu kaf-e-ḳhak o be-basar main kaf-e-ḳhak o ḳhud-nigar
Kisht-e-vajud ke liye ab-e-ravan hai tu ki mai
Chand nikle kisī janib tiri zebai ka
Rañg badle kisi surat shab-e-tanhai ka
Daulat-e-lab se phir ai ḳhusrav-e-shirin-dahanan
Aaj arzan ho koi harf shanasai ka
Garmi-e-rashk se har anjuman-e-gul-badanan
Tazkira chheḌe tiri pairahan-arai ka
Sehn-e-gulshan men kabhi ai shah-e-shamshad-qadan
Phir nazar aa.e saliqa tiri raanai ka
Ek baar aur masiha-e-dil-e-dil-zadagan
Koi vaada koi iqrar masihai ka
Diida o dil ko sambhalo ki sar-e-shām-e-firaq
Saz-o-saman baham pahuncha hai rusvai ka
Be-dam hue bimar dava kyun nahin dete
Tum achchhe masihā ho shifa kyun nahin dete
Dard-e-shab-e-hijran ki jaza kyun nahin dete
Khun-e-dil-e-vahshi kā sila kyun nahin dete
MiT jaegi maḳhluq to insaf karoge
Munsif ho to ab hashr utha kyuun nahin dete
Haañ nukta-varo laao lab o dil kī gavāhī
Haan naġhmagaro saz-e-sada kyuun nahin dete
Paiman-e-junun hathon ko sharma.ega kab tak
Dil vaalo gareban ka pata kyun nahin dete
Barbadi-e-dil jabr nahin ‘Faiz’ kisi ka
Vo dushman-e-jan hai to bhula kyuun nahin dete
Baat bas se nikal chali hai
Dil ki halat sambhal chali hai
Ab junun had se badh chala hai
Ab tabiat bahal chali hai
Ashk ḳhunab ho chale hain
Gham ki rangat badal chali hai
Ya yunhi bujh rahi hain shamen
Ya shab-e-hijr Tal chali hai
Laakh paiġham ho gae hain
Jab saba ek pal chali hai
Jaao ab so raho sitaro
Dard ki raat Dhal chali hai
Ab vahi harf-e-junun sab ki zaban Thahri hai
Jo bhi chal nikli hai vo baat kahan Thahri hai
Aaj tak shaiḳh ke ikram men jo shai thi haram
Ab vahi dushman-e-din rahat-e-jan Thahri hai
Hai ḳhabar garm ki phirta hai gurezan naseh
Guftugu aaj sar-e-ku-e-butan Thahri hai
Hai vahi ariz-e-laila vahi shirin ka dahan
Nigah-e-shauq ghadi bhar ko jahan Thahri hai
Vasl ki shab thi to kis darja subuk guzri thi
Hijr ki shab hai to kya saḳht giran Thahri hai
Bikhri ik baar to haath aai hai kab mauj-e-shamim
Dil se nikli hai to kab lab pe fuġhan Thahri hai
Dast-e-sayyad bhi aajiz hai kaf-e-gul-chin bhi
Bū-e-gul Thahri na bulbul ki zaban Thahri hai
Aate aate yunhi dam bhar ko rukī hogi bahar
Jaate jaate yūñhī pal bhar ko ḳhizan Thahri hai
Ham ne jo tarz-e-fuġhan ki hai qafas meñ ījād
‘Faiz’ gulshan meñ vahī tarz-e-bayan Thahri hai
Ab ke baras dastūr-e-sitam meñ kyā kyā baab īzād hue
Jo qātil the maqtūl hue jo said the ab sayyād hue
Pahle bhī ḳhizāñ meñ baaġh ujḌe par yuuñ nahīñ jaise ab ke baras
Saare buuTe patta patta ravish ravish barbād hue
Pahle bhī tavāf-e-sham-e-vafā thī rasm mohabbat vāloñ kī
Ham tum se pahle bhī yahāñ ‘mansūr’ hue ‘farhād’ hue
Ik gul ke murjhāne par kyā gulshan meñ kohrām machā
Ik chehra kumhlā jaane se kitne dil nāshād hue
‘Faiz’ na ham ‘yūsuf’ na koī ‘yāqūb’ jo ham ko yaad kare
Apnī kyā kan.āñ meñ rahe yā misr meñ jā ābād hue
Ab jo koī pūchhe bhī to us se kyā sharh-e-hālāt kareñ
Dil Thahre to dard sunā.eñ dard thame to baat kareñ
Shaam huī phir josh-e-qadah ne bazm-e-harīfāñ raushan kī
Ghar ko aag lagā.eñ ham bhī raushan apnī raat kareñ
Qatl-e-dil-o-jāñ apne sar hai apnā lahū apnī gardan pe
Mohr-ba-lab baiThe haiñ kis kā shikva kis ke saath kareñ
Hijr meñ shab bhar dard-o-talab ke chāñd sitāre saath rahe
Sub.h kī vīrānī meñ yaaro kaise basar auqāt kareñ
”Aap kī yaad aatī rahī raat bhar”
Chāñdnī dil dukhātī rahī raat bhar
Gaah jaltī huī gaah bujhtī huī
Sham-e-ġham Jhilmilātī rahī raat bhar
Koī ḳhushbū badaltī rahī pairahan
Koī tasvīr gaatī rahī raat bhar
Phir sabā sāya-e-shāḳh-e-gul ke tale
Koī qissa sunātī rahī raat bhar
Jo na aayā use koī Zanjīr-e-dar
Har sadā par bulātī rahī raat bhar
Ek ummīd se dil Bahaltā rahā
Ik tamannā satātī rahī Raat Bhar