FaqIh-e-shahr kI majlis se kuchh bhala na hua
ki us se mil ke mizaj aur kafirana hua
Abhi abhi vo mila tha hazar baten kiin
Abhi abhi vo gaya hai magar zamana hua
Vo raat bhuul chuko vo suḳhan na doharao
Vo raat ḳhvab hui vo suḳhan fasana hua
Kuchh ab ke aise kade the firaq ke mausam
Tiri hi baat nahin main bhi kya se kya na hua
Hujum aisa ki rahen nazar nahin atin
Nasib aisa ki ab tak to qafila na hua
Shahid-e-shab faqat ahmad-‘farāz’ hi to nahin
Ki jo charaġh-ba-kaf tha vahi nishana hua
Dukh fasana nahin ki tujh se kahen
Dil bhi maana nahin ki tujh se kahen
Aaj tak apni bekali ka sabab
Khud bhi jaana nahin ki tujh se kahen
Be-tarah hal-e-dil hai aur tujh se
Dostana nahin ki tujh se kahen
Ek tu harf-e-ashna tha magar
Ab zamana nahin ki tujh se kahen
Qasida ham faqir logon ka
Ik Thikana nahin ki tujh se kahen
Ai ḳhuda dard-e-dil hai baḳhshish-e-dost
Ab-o-dana nahin ki tujh se kahen
Ab to apna bhi us gali men ‘farāz’
Aana jaana nahin ki tujh se kahen
dost ban kar bhī nahīñ saath nibhāne vaalā
vahī andāz hai zālim kā zamāne vaalā
ab use log samajhte haiñ giraftār mirā
saḳht nādim hai mujhe daam meñ laane vaalā
sub.h-dam chhoḌ gayā nik.hat-e-gul kī sūrat
raat ko ġhuncha-e-dil meñ simaT aane vaalā
kyā kaheñ kitne marāsim the hamāre us se
vo jo ik shaḳhs hai muñh pher ke jaane vaalā
tere hote hue aa jaatī thī saarī duniyā
aaj tanhā huuñ to koī nahīñ aane vaalā
muntazir kis kā huuñ TuuTī huī dahlīz pe maiñ
kaun aa.egā yahāñ kaun hai aane vaalā
kyā ḳhabar thī jo mirī jaañ meñ ghulā hai itnā
hai vahī mujh ko sar-e-dār bhī laane vaalā
maiñ ne dekhā hai bahāroñ meñ chaman ko jalte
hai koī ḳhvāb kī tābīr batāne vaalā
tum takalluf ko bhī iḳhlās samajhte ho ‘Farāz’
dost hotā nahīñ har haath milāne vaalā
Dil-girafta hī sahī bazm sajā lī jaa.e
Yād-e-jānāñ se koī shaam na ḳhālī jaa.e
Rafta rafta yahī zindāñ meñ badal jaate haiñ
Ab kisī shahr kī buniyād na Daalī jaa.e
Mus.haf-e-ruḳh hai kisī kā ki bayāz-e-hāfiz
Aise chehre se kabhī faal nikālī jaa.e
Vo muravvat se milā hai to jhukā duuñ gardan
Mere dushman kā koī vaar na ḳhālī jaa.e
Be-navā shahr kā saaya hai mire dil pe ‘Farāz’
Kis tarah se mirī āshufta-ḳhayālī jaa.e
Dil munāfiq thā shab-e-hijr meñ soyā kaisā
Aur jab tujh se milā TuuT ke royā kaisā
Zindagī meñ bhī ġhazal hī kā qarīna rakkhā
Khvāb-dar-ḳhvāb tire ġham ko piroyā kaisā
Ab to chehroñ pe bhī katboñ kā gumāñ hotā hai
Añkheñ pathrā.ī huī haiñ lab-e-goyā kaisā
Dekh ab qurb kā mausam bhī na sarsabz lage
Hijr hī hijr marāsim meñ samoyā kaisā
Ek aañsū thā ki dariyā-e-nadāmat thā ‘Farāz’
Dil se bebāk shanāvar ko Duboyā kaisā
Dil badan kā sharīk-e-hāl kahāñ
Hijr phir hijr hai visāl kahāñ
Ishq hai naam intihāoñ kā
Is samundar meñ e’tidāl kahāñ
Aisā nashsha to zahr meñ bhī na thā
Ai ġham-e-dil tirī misāl kahāñ
Ham ko bhī apnī pā.emālī kā
Hai magar is qadar malāl kahāñ
Maiñ na.ī dostī ke moḌ pe thā
Aa gayā hai tirā ḳhayāl kahāñ
Dil ki ḳhush-fahm thā so hai varna
Tere milne kā ehtimāl kahāñ
Vasl o hijrāñ haiñ aur duniyā.eñ
In zamānoñ meñ māh-o-sāl kahāñ
Tujh ko dekhā to log hairāñ haiñ
Aa gayā shahr meñ ġhazāl kahāñ
Tujh pe likkhī to saj ga.ī hai ġhazal
Aa milā ḳhvāb se ḳhayāl kahāñ
Ab to shah maat ho rahī hai ‘Farāz’
Ab bachāv kī koī chaal kahāñ
Chale the yaar baḌe zo.am meñ havā kī tarah
PalaT ke dekhā to baiThe haiñ naqsh-e-pā kī tarah
Mujhe vafā kī talab hai magar har ik se nahīñ
Koī mile magar us yār-e-bevafā kī tarah
Mire vajūd kā sahrā hai muntazir kab se
Kabhī to aa jaras-e-ġhuncha kī sadā kī tarah
Vo ajnabī thā to kyuuñ mujh se pher kar āñkheñ
Guzar gayā kisī derīna āshnā kī tarah
Kashāñ kashāñ liye jaatī hai jānib-e-manzil
Nafas kī Dor bhī zanjīr-e-be-sadā kī tarah
‘Farāz’ kis ke sitam kā gilā kareñ kis se
Ki be-niyāz huī ḳhalq bhī ḳhudā kī tarah
Chal nikaltī haiñ ġham-e-yār se bāteñ kyā kyā
Ham ne bhī kiiñ dar-o-dīvār se bāteñ kyā kyā
Baat ban aa.ī hai phir se ki mire baare meñ
Us ne pūchhīñ mire ġham-ḳhvār se bāteñ kyā kyā
Log lab-basta agar hoñ to nikal aatī haiñ
Chup ke pairāya-e-iz.hār se bāteñ kyā kyā
Kisī saudā.ī kā qissa kisī harjā.ī kī baat
Log le aate haiñ bāzār se bāteñ kyā kyā
Ham ne bhī dast-shanāsī ke bahāne kī haiñ
Haath meñ haath liye pyaar se bāteñ kyā kyā
Kis ko biknā thā magar ḳhush haiñ ki is hiile se
Ho ga.iiñ apne ḳharīdār se bāteñ kyā kyā
Ham haiñ ḳhāmosh ki majbūr-e-mohabbat the ‘Farāz’
Varna mansūb haiñ sarkār se bāteñ kyā kyā
Chāk-pairāhanī-e-gul ko sabā jāntī hai
Mastī-e-shauq kahāñ band-e-qabā jāntī hai
Ham to badnām-e-mohabbat the so rusvā Thahre
Nāsehoñ ko bhī magar ḳhalq-e-ḳhudā jāntī hai
Kaun tāqoñ pe rahā kaun sar-e-rāhguzar
Shahr ke saare charāġhoñ ko havā jāntī hai
Havas in.aam samajhtī hai karam ko tere
Aur mohabbat hai ki ehsāñ ko sazā jāntī hai
Bhed paa.eñ to rah-e-yār meñ gum ho jaa.eñ
Varna kis vāste bekār meñ gum ho jaa.eñ
Kyā kareñ arz-e-tamannā ki tujhe dekhte hī
Lafz pairāya-e-iz.hār meñ gum ho jaa.eñ
Ye na ho tum bhī kisī bhiiḌ meñ kho jaao kahīñ
Ye na ho ham kisī bāzār meñ gum ho jaa.eñ
Kis tarah tujh se kaheñ kitnā bhalā lagtā hai
Tujh ko dekheñ tire dīdār meñ gum ho jaa.eñ
Ham tire shauq meñ yuuñ ḳhud ko gañvā baiThe haiñ
Jaise bachche kisī tyauhār meñ gum ho jaa.eñ
Pech itne bhī na do kirmak-e-resham kī tarah
Dekhnā sar hī na dastār meñ gum ho jaa.eñ
Aisā āshob-e-zamāna hai ki Dar lagtā hai
Dil ke mazmūñ hī na ash.ār meñ gum ho jaa.eñ
Shahryāroñ ke bulāve bahut aate haiñ ‘Farāz’
Ye na ho aap bhī darbār meñ gum ho jaaeñ