Category: Shayar

Ek ek qatre kā mujhe denā paḌā Hisāb

Khūn-e-jigar vadī.at-e-mizhgān-e-yār thā

Ab maiñ huuñ aur mātam-e-yak-shahr-Arzū

Todā jo tū ne aa.ina timsāl-dār thā

Galiyoñ meñ merī na.ash ko khīñche phiro ki maiñ

Jāñ-Dāda-e-havā-e-sar-e-rahguzār thā

Mauj-e-Sarāb-e-dasht-e-vafā kā na pūchh haal

Har zarra misl-e-jauhar-e-teġh āb-dār thā

Kam jānte the ham bhī ġham-e-ishq ko par ab

Dekhā to kam hue pa ġham-e-rozgār thā

Dil-e-nādāñ tujhe huā kyā hai

Aḳhir is dard kī davā kyā hai

Ham haiñ mushtāq aur vo be-zār

Yā ilāhī ye mājrā kyā hai

Maiñ bhī muñh meñ zabān rakhtā huuñ

Kaash pūchho ki mudda.ā kyā hai

Jab ki tujh bin nahīñ koī maujūd

Phir ye hañgāma ai ḳhudā kyā hai

Ye parī-chehra log kaise haiñ

Ghamza o ishva o adā kyā hai

Shikan-e-zulf-e-ambarīñ kyuuñ hai

Nigah-e-chashm-e-surma sā kyā hai

Sabza o gul kahāñ se aa.e haiñ

Abr kyā chiiz hai havā kyā hai

Ham ko un se vafā kī hai ummīd

Jo nahīñ jānte vafā kyā hai

Haañ bhalā kar tirā bhalā hogā

Aur darvesh kī sadā kyā hai

Jaan tum par nisār kartā huuñ

Maiñ nahīñ jāntā duā kyā hai

Maiñ ne maanā ki kuchh nahīñ ‘Ghālib’

Muft haath aa.e to burā kyā hai..

Dil mirā soz-e-nihāñ se be-muhābā jal gayā

Atish-e-ḳhāmosh kī mānind goyā jal gayā

Dil meñ zauq-e-vasl o yād-e-yār tak baaqī nahīñ

Aag is ghar meñ lagī aisī ki jo thā jal gayā

Maiñ adam se bhī pare huuñ varna ġhāfil bār-hā

Merī āh-e-ātishīñ se bāl-e-unqā jal gayā

Arz kiije jauhar-e-andesha kī garmī kahāñ

Kuchh ḳhayāl aayā thā vahshat kā ki sahrā jal gayā

Dil nahīñ tujh ko dikhātā varna dāġhoñ kī bahār

Is charāġhāñ kā karūñ kyā kār-farmā jal gayā

Maiñ huuñ aur afsurdagī kī aarzū ‘ġhālib’ ki dil

Dekh kar tarz-e-tapāk-e-ahl-e-duniyā jal gayā

Duud merā sumbulistāñ se kare hai ham-sarī

Bas-ki shauq-e-ātish-e-gul se sarāpā jal gayā

Dil se tirī nigāh jigar tak utar ga.ī

Donoñ ko ik adā meñ razā-mand kar ga.ī

Shaq ho gayā hai siina ḳhushā lazzat-e-farāġh

Taklīf-e-parda-dāri-e-zaḳhm-e-jigar ga.ī

Vo bāda-e-shabāna kī sarmastiyāñ kahāñ

Uthiye bas ab ki lazzat-e-ḳhvāb-e-sahar ga.ī

Udtī phire hai ḳhaak mirī kū-e-yār meñ

Baare ab ai havā havas-e-bāl-o-par ga.ī

Dekho to dil-farebi-e-andāz-e-naqsh-e-pā

Mauj-e-ḳhirām-e-yār bhī kyā gul katar ga.ī

Har bul-havas ne husn-parastī shi.ār kī

Ab ābrū-e-sheva-e-ahl-e-nazar ga.ī

Nazzāre ne bhī kaam kiyā vaañ naqāb kā

Mastī se har nigah tire ruḳh par bikhar ga.ī

Fardā o dī kā tafraqa yak baar miT gayā

Kal tum ga.e ki ham pe qayāmat guzar ga.ī

Maarā zamāne ne asadullāh ḳhaañ tumheñ

Vo valvale kahāñ vo javānī kidhar gaī

Dil lagā kar lag gayā un ko bhī tanhā baiThnā

Bare apnī bekasī kī ham ne paa.ī daad yaañ

Haiñ zavāl-āmāda ajzā āfrīnash ke tamām

Mahr-e-gardūñ hai charāġh-e-rahguzār-e-bād yaañ

Hai tarahhum-āfrīñ ārā.ish-e-be-dād yaañ

Ashk-e-chashm-e-dām hai har dāna-e-sayyād yaañ

Dīvānagī se dosh pe zunnār bhī nahīñ

Yaanī hamāre jaib meñ ik taar bhī nahīñ

Dil ko niyāz-e-hasrat-e-dīdār kar chuke

Dekhā to ham meñ tāqat-e-dīdār bhī nahīñ

Milnā tirā agar nahīñ āsāñ to sahl hai

Dushvār to yahī hai ki dushvār bhī nahīñ

Be-ishq umr kaT nahīñ saktī hai aur yaañ

Tāqat ba-qadr-e-lazzat-e-āzār bhī nahīñ

Shorīdgī ke haath se hai sar vabāl-e-dosh

Sahrā meñ ai ḳhudā koī dīvār bhī nahīñ

Gunjā.ish-e-adāvat-e-aġhyār yak taraf

Yaañ dil meñ zo.af se havas-e-yār bhī nahīñ

Dar nāla-hā-e-zār se mere ḳhudā ko maan

Aḳhir navā-e-murġh-e-giraftār bhī nahīñ

Dil meñ hai yaar kī saf-e-mizhgāñ se rū-kashī

Hālāñki tāqat-e-ḳhalish-e-ḳhār bhī nahīñ

Is sādgī pe kaun na mar jaa.e ai ḳhudā

laḌte haiñ aur haath meñ talvār bhī nahīñ

Dekhā ‘asad’ ko ḳhalvat-o-jalvat meñ bār-hā

Dīvāna gar nahīñ hai to hushyār bhī nahīñ….

Diyā hai dil agar us ko bashar hai kyā kahiye

Huā raqīb to ho nāma-bar hai kyā kahiye

Ye zid ki aaj na aave aur aa.e bin na rahe

Qazā se shikva hameñ kis qadar hai kyā kahiye

Rahe hai yuuñ gah-o-be-gah ki kū-e-dost ko ab

Agar na kahiye ki dushman kā ghar hai kyā kahiye

Zahe karishma ki yuuñ de rakkhā hai ham ko fareb

Ki bin kahe haiñ unheñ sab ḳhabar hai kyā kahiye

Samajh ke karte haiñ bāzār meñ vo pursish-e-hāl

Ki ye kahe ki sar-e-rahguzar hai kyā kahiye

Tumheñ nahīñ hai sar-e-rishta-e-vafā kā ḳhayāl

Hamāre haath meñ kuchh hai magar hai kyā kahiye

Unheñ savāl pe zom-e-junūñ hai kyuuñ laḌiye

Hameñ javāb se qat-e-nazar hai kyā kahiye

Hasad sazā-e-kamāl-e-suḳhan hai kyā kījiye

Sitam bahā-e-matā-e-hunar hai kyā kahiye

Kahā hai kis ne ki ‘ġhālib’ burā nahīñ lekin

Sivā.e is ke ki āshufta-sar hai kyā kahiye…..

Dono jahān de ke vo samjhe ye ḳhush rahā

Yaañ aa padī ye sharm ki takrār kyā kareñ

Thak thak ke har maqām pe do chaar rah ga.e

Terā pata na paa.eñ to nā-chār kyā kareñ

Kyā sham.a ke nahīñ haiñ havā-ḳhvāh bazm meñ

Ho ġham hī jāñ-gudāz to ġham-ḳhvār kyā kareñ

Dost ġham-ḳhvārī meñ merī sa.ī farmāveñge kyā

Zaḳhm ke bharte talak nāḳhun na baḌh jāveñge kyā

Be-niyāzī had se guzrī banda-parvar kab talak

Ham kaheñge hāl-e-dil aur aap farmāveñge kyā

Hazrat-e-nāseh gar aaveñ diida o dil farsh-e-rāh

Koī mujh ko ye to samjhā do ki samajhāveñge kyā

Aaj vaañ teġh o kafan bāñdhe hue jaatā huuñ maiñ

Uzr mere qatl karne meñ vo ab lāveñge kyā

Gar kiyā nāseh ne ham ko qaid achchhā yuuñ sahī

Ye junūn-e-ishq ke andāz chhuT jāveñge kyā

Khāna-zād-e-zulf haiñ zanjīr se bhāgeñge kyuuñ

Haiñ giraftār-e-vafā zindāñ se ghabarāveñge kyā

Hai ab is māmūre meñ qaht-e-ġham-e-ulfat ‘asad’

Ham ne ye maanā ki dillī meñ raheñ khāveñge kyā…..

Dil hī to hai na sañg-o-ḳhisht dard se bhar na aa.e kyuuñ

Roeñge ham hazār baar koī hameñ satāe kyuñ

Dair nahīñ haram nahīñ dar nahīñ āstāñ nahīñ

BaiThe haiñ rahguzar pe ham ġhair hameñ uthāe kyuuñ

Jab vo jamāl-e-dil-faroz sūrat-e-mehr-e-nīm-roz

Aap hī ho nazzāra-soz parde meñ muñh chhupāe kyuuñ

Dashna-e-ġhamza jāñ-sitāñ nāvak-e-Nāz be-panāh

Terā hī aks-e-ruḳh sahī sāmne tere aa.e kyuuñ

Qaid-e-hayāt o band-e-ġham asl meñ donoñ ek haiñ

Maut se pahle aadmī ġham se najāt paa.e kyuuñ

Husn aur us pe husn-e-zan rah ga.ī bul-havas kī sharm

Apne pe e’timād hai ġhair ko āzmā.e kyuuñ

Vaañ vo ġhurūr-e-izz-o-nāz yaañ ye hijāb-e-pās-e-vaza.a

Raah meñ ham mileñ kahāñ bazm meñ vo bulā.e kyuuñ

Haañ vo nahīñ ḳhudā-parast jaao vo bevafā sahī

Jis ko ho diin o dil aziiz us kī galī meñ jaa.e kyuuñ

‘Ghālib’-e-ḳhasta ke baġhair kaun se kaam band haiñ

Roiye zaar zaar kyā kījiye hae hae kyuñ…