Category: Shayar

Dhotā huuñ jab maiñ piine ko us sīm-tan ke Paañv

Rakhtā hai zid se khīñch ke bāhar lagan ke Paañv

Dī sādgī se jaan padūñ kohkan ke Paañv

Haihāt kyuuñ na TuuT ga.e pīr-zan ke Paañv

Bhāge the ham bahut so usī kī sazā hai ye

Ho kar asiir dābte haiñ rāhzan ke paañv

Marham kī justujū meñ phirā huuñ jo dur dur

Tan se sivā figār haiñ is ḳhasta-tan ke Paañv

Allāh-re zauq-e-dasht-navardī ki ba.ad-e-marg

Hilte haiñ ḳhud-ba-ḳhud mire andar kafan ke Paañv

Hai josh-e-gul bahār meñ yaañ tak ki har taraf

Udte hue ulajhte haiñ murġh-e-chaman ke Paañv

Shab ko kisī ke ḳhvāb meñ aayā na ho kahīñ

Dukhte haiñ aaj us but-e-nāzuk-badan ke Paañv

‘Ghālib’ mire kalām meñ kyūñkar mazā na ho

Piitā huuñ dhoke ḳhusrav-e-shīrīñ-suḳhan ke Paañv….

Dhamkī meñ mar gayā jo na bāb-e-Nabard thā

Ishq-e-nabard-pesha Talabgār-e-mard thā

Thā zindagī meñ marg kā khatkā lagā huā

Udne se pesh-tar bhī mirā rañg Zard thā

Tālīf nusḳha-hā-e-vafā kar rahā thā maiñ

Majmūa-e-ḳhayāl abhī fard fard thā

Dil tā jigar ki sāhil-e-dariyā-e-ḳhūñ hai ab

Is rahguzar meñ jalva-e-gul aage gard thā

Jaatī hai koī kashmakash andoh-e-Ishq kī

Dil bhī agar gayā to vahī dil kā dard thā

ahbāb chārasāzi-e-vahshat na kar sake

Zindāñ meñ bhī ḳhayāl bayābāñ-navard thā

Ye lāsh-e-be-kafan ‘asad’-e-Khasta-jāñ kī hai

Haq maġhfirat kare ajab āzād mard thā….

Dekhnā qismat ki aap apne pe rashk aa jae hai

Maiñ use dekhūñ bhalā kab mujh se dekhā jae hai

Haath dho dil se yahī garmī gar Andeshe meñ hai

Abgīna tundi-e-sahbā se pighlā jae hai

Ghair ko yā rab vo kyūñkar mana-e-Gustāḳhī kare

Gar hayā bhī us ko aatī hai to sharmā jae hai

Shauq ko ye lat ki har dam naala khīñche jā.iye

Dil kī vo hālat ki dam lene se ghabrā jae hai

Dur chashm-e-bad tirī bazm-e-tarab se vaah vaah

Naġhma ho jaatā hai vaañ gar naala merā jae hai

Garche hai tarz-e-taġhāful parda-dār-e-Rāz-e-ishq

Par ham aise kho.e jaate haiñ ki vo pā jae hai

Us kī bazm-ārā.iyāñ sun kar dil-e-ranjūr yaañ

Misl-e-naqsh-e-Mudda.ā-e-ġhair baithā jae hai

Ho ke āshiq vo parī-ruḳh aur nāzuk ban gayā

Rañg khultā jaa.e hai jitnā ki udtā jae hai

Naqsh ko us ke musavvir par bhī kyā kyā Naaz haiñ

Khīñchtā hai jis qadar utnā hī khiñchtā jae hai

Saya merā mujh se misl-e-dūd bhāge hai ‘Asad’

Paas mujh ātish-ba-jāñ ke kis se Thahrā jae hai

Dar-ḳhūr-e-Qahr-o-Ghazab jab koī ham sā na huā

Phir ġhalat kyā hai ki ham sā koī paidā na huā

Bandagī meñ bhī vo Azāda o ḳhud-bīñ haiñ ki ham

UlTe phir aae dar-e-kāba agar vā na huā

Sab ko Maqbūl hai daavā tirī yaktā.ī kā

Rū-ba-rū koī but-e-ā.ina-sīmā na huā

Kam nahīñ Nāzish-e-Hamnāmi-e-Chashm-e-Khūbāñ

Terā bīmār burā kyā hai gar achchhā na huā

Siine kā daaġh hai vo naala ki lab tak na gayā

Khaak kā rizq hai vo qatra ki dariyā na huā

Naam kā mere hai jo dukh ki kisī ko na milā

Kaam meñ mere hai jo fitna ki barpā na huā

Har-bun-e-mū se dam-e-zikr na Tapke Khuñ naab

Hamza kā qissa huā ishq kā charchā na huā

Qatra meñ dajla dikhā.ī na de aur juzv meñ kul

Khel ladkoñ kā huā dīda-e-bīnā na huā

Thī ḳhabar garm ki ‘Ghālib’ ke Udeñge purze

Dekhne ham bhī ga.e the pa tamāshā na huā

Dard se mere hai tujh ko be-qarārī hae hae

Kyā huī Zālim tirī ġhaflat-shi.ārī hae hae

Tere dil meñ gar na thā āshob-e-ġham kā hausla

Tū ne phir kyuuñ kī thī merī ġham-gusārī hae hae

Kyuñ mirī ġham-ḳhvārgī kā tujh ko aayā thā ḳhayāl

Dushmanī apnī thī merī dost-dārī haa.e hae

Uamr bhar kā tū ne paimān-e-vafā bāñdhā to kyā

Uamr ko bhī to nahīñ hai pā.edārī hae hae

Zahr lagtī hai mujhe āb-o-havā-e-zindagī

Yaanī tujh se thī ise nā-sāzgārī hae hae

Gul-fishānī-hā-e-nāz-e-jalva ko kyā ho gayā

Khaak par hotī hai terī lāla-kārī hae hae

Sharm-e-rusvā.ī se jā chhupnā naqāb-e-ḳhāk meñ

Khatm hai ulfat kī tujh par parda-dārī haa.e hae

Khaak meñ nāmūs-e-paimān-e-mohabbat mil gaī

UTh ga.ī duniyā se rāh-o-rasm-e-yārī haa.e hae

Haath hī teġh-āzmā kā kaam se jaatā rahā

Dil pe ik lagne na paayā zaḳhm-e-kārī hae hae

Kis tarah kaaTe koī shab-hā-e-tār-e-barshigāl

Hai nazar ḳhū-karda-e-aḳhtar-shumārī hae haa.e

Gosh mahjūr-e-payām o chashm-e-mahrūm-e-jamāl

Ek dil tis par ye nā-ummīd-vārī hae hae

Ishq ne pakḌā na thā ‘ġhālib’ abhī vahshat kā rañg

Rah gayā thā dil meñ jo kuchh zauq-e-ḳhvārī hae hae

Dahr meñ naqsh-e-vafā vajhe-tasallī na huā

Hai ye vo lafz ki sharminda-e-manī na huā

Sabza-e-ḳhat se tirā kākul-e-sarkash na dabā

Ye zamurrad bhī harīf-e-dam-e-afī na huā

Maiñ ne chāhā thā ki andoh-e-vafā se Chhūtūñ

Vo sitamgar mire marne pe bhī Raazī na huā

Dil guzargāh-e-ḳhayāl-e-mai-o-Sāġhar hī sahī

Gar nafas jāda-e-sar-manzil-e-Taqvī na huā

Huñ tire va.ada na karne meñ bhī Raazī ki kabhī

Gosh minnat-kash-e-gulbāñg-e-tasallī na huā

Kis se mahrūmī-e-qismat kī shikāyat kiije

Ham ne chāhā thā ki mar jaa.eñ so vo bhī na huā

Mar gayā sadma-e-yak-jumbish-e-lab se ‘Ghālib’

Nā-tavānī se harīf-e-dam-e-īsī na huā

Chashm-e-ḳhūbāñ ḳhāmushī meñ bhī navā-Pardāz hai

Surma to kahve ki dūd-e-shola-e-Avāz hai

Paikar-e-ushshāq sāz-e-tāla-e-nā-Sāz hai

Naala goyā gardish-e-saiyyāra kī Avāz hai

Dast-gāh-e-dīda-e-ḳhūñ-bār-e-majnūñ dekhnā

Yak-bayābāñ jalva-e-gul farsh-e-pā-Andāz hai

Chāhiye achchhoñ ko jitnā chāhiye

Ye agar chāheñ to phir kyā chāhiye

Sohbat-e-rindāñ se vājib hai Hazar

Jā-e-mai apne ko khīñchā chāhiye

Chāhne ko tere kyā samjhā thā Dil

Bare ab is se bhī samjhā Chāhiye

Chaak mat kar jaib be-ayyām-e-Gul

Kuchh udhar kā bhī ishārā chāhiye

Dostī kā parda hai begānagī

Muñh chhupānā ham se chhodā chāhiye

Dushmanī ne merī khoyā Ghair ko

Kis qadar dushman hai dekhā chāhiye

Apnī rusvā.ī meñ kyā chaltī hai saī

Yaar hī hañgāma-ārā chāhiye

Munhasir marne pe ho jis kī Umiid

Nā-umīdī us kī dekhā chāhiye

Ghāfil in mah-tal.atoñ ke vāste

Chāhne vaalā bhī achchhā chāhiye

Chāhte haiñ ḳhūb-rūyoñ ko ‘Asad’

Aap kī Sūrat to dekhā Chāhiye

Chaak kī ḳhvāhish agar Vahshat ba-Uryānī kare

Sub.h ke mānind zaḳhm-e-dil Garebānī kare

Jalve kā tere vo aalam hai ki gar kiije Khayāl

Dīda-e-dil ko ziyārat-gāh-e-hairānī kare

Hai shikastan se bhī dil naumīd yā rab kab Talak

Abgīna koh par arz-e-girāñ-jānī kare

Mai-kada gar chashm-e-mast-e-nāz se Paave Shikast

Mū-e-shīsha dīda-e-sāġhar kī mizhgānī kare

Khatt-e-āriz se likhā hai zulf ko Ulfat ne ahd

Yak-qalam manzūr hai jo kuchh pareshānī kare…