Category: Shayar

Huzūr-e-shāh meñ ahl-e-suḳhan kī āzmā.ish hai

Chaman meñ ḳhush-navāyan-e-chaman kī āzmā.ish hai

Qad o gesū meñ qais o kohkan kī āzmā.ish hai

Jahāñ ham haiñ vahāñ dār-o-rasan kī āzmā.ish hai

Rareñge kohkan ke hausle kā imtihān āḳhir

Abhī us ḳhasta ke nerve tan kī āzmā.ish hai

Nasīm-e-misr ko kyā pīr-e-kan.āñ kī havā-ḳhvāhī

Use yūsuf kī bū-e-pairahan kī āzmā.ish hai

Vo aayā bazm meñ dekho na kahiyo phir ki ġhāfil the

Shakeb-o-sabr-e-ahl-e-anjuman kī āzmā.ish hai

Rahe dil hī meñ tiir achchhā jigar ke paar ho behtar

Gharaz shust-e-but-e-nāvak-fagan kī āzmā.ish hai

Nahīñ kuchh sub.ha-o-zunnār ke phande meñ gīrā.ī

Vafādārī meñ shaiḳh o barhaman kī āzmā.ish hai

PaḌā rah ai dil-e-vābasta betābī se kyā hāsil

Magar phir tāb-e-zulf-e-pur-shikan kī āzmā.ish hai

Rag-o-pai meñ jab utre zahr-e-ġham tab dekhiye kyā ho

Abhī to talḳhī-e-kām-o-dahan kī āzmā.ish hai

vo āveñge mire ghar va.ada kaisā dekhnā ‘Ghālib’

Na.e fitnoñ meñ ab charḳh-e-kuhan kī āzmā.ish hai

Husn-e-mah garche ba-hañgām-e-kamāl achchhā hai

Us se merā mah-e-ḳhurshīd-jamāl achchhā hai

Bosa dete nahīñ aur dil pe hai har lahza nigāh

Jī meñ kahte haiñ ki muft aa.e to maal achchhā hai

Aur bāzār se le aa.e agar TuuT gayā

Sāġhar-e-jam se mirā jām-e-sifāl achchhā hai

Be-talab deñ to mazā us meñ sivā miltā hai

Vo gadā jis ko na ho ḳhū-e-savāl achchhā hai

Un ke dekhe se jo aa jaatī hai muñh par raunaq

Vo samajhte haiñ ki bīmār kā haal achchhā hai

Dekhiye paate haiñ ushshāq butoñ se kyā faiz

Ik barhaman ne kahā hai ki ye saal achchhā hai

Ham-suḳhan tesha ne farhād ko shīrīñ se kiyā

Jis tarah kā ki kisī meñ ho kamāl achchhā hai

Qatra dariyā meñ jo mil jaa.e to dariyā ho jaa.e

Kaam achchhā hai vo jis kā ki ma.aal achchhā hai

Khizr-sultāñ ko rakhe ḳhāliq-e-akbar sarsabz

Shaah ke baaġh meñ ye taaza nihāl achchhā hai

Ham ko ma.alūm hai jannat kī haqīqat lekin

Dil ke ḳhush rakhne ko ‘ġhālib’ ye ḳhayāl achchhā hai

Hujūm-e-nāla hairat ājiz-e-arz yak-afġhāñ hai

Khamoshī resha-e-sad-nīstāñ se ḳhas-ba-dandāñ hai

Takalluf-bar-taraf hai jāñ-sitāñ-tar lutf-e-bad-ḳhūyāñ

Nigāh-e-be-hijāb-e-nāz teġh-e-tez-e-uryāñ hai

Huī ye kasrat-e-ġham se talaf kaifiyat-e-shādī

Ki sub.h-e-īd mujh ko bad-tar az-chāk-e-garebāñ hai

Dil o diiñ naqd lā saaqī se gar saudā kiyā chāhe

Ki us bāzār meñ sāġhar matā-e-dast-gardāñ hai

Gham āġhosh-e-balā meñ parvarish detā hai āshiq ko

Charāġh-e-raushan apnā qulzum-e-sarsar kā marjāñ hai

Ham se khul jaao ba-vaqt-e-mai-parastī ek din

Varna ham chheḌeñge rakh kar uzr-e-mastī ek din

Gharra-e-auj-e-binā-e-ālam-e-imkāñ na ho

Is bulandī ke nasīboñ meñ hai pastī ek din

Qarz kī piite the mai lekin samajhte the ki haañ

Rañg lāvegī hamārī fāqa-mastī ek din

Naġhma-hā-e-ġham ko bhī ai dil ġhanīmat jāniye

Be-sadā ho jā.egā ye sāz-e-hastī ek din

Dhaul-dhappā us sarāpā-nāz kā sheva nahīñ

Ham hī kar baiThe the ‘ġhālib’ pesh-dastī ek din

Ho ga.ī hai ġhair kī shīrīñ-bayānī kārgar

Ishq kā us ko gumāñ ham be-zabānoñ par nahīñ

Ham par jafā se tark-e-vafā kā gumāñ nahīñ

Ik chheḌ hai vagarna murād imtihāñ nahīñ

Kis muñh se shukr kījiye is lutf-e-ḳhās kā

Pursish hai aur pā-e-suḳhan darmiyāñ nahīñ

Ham ko sitam aziiz sitamgar ko ham aziiz

Nā-mehrbāñ nahīñ hai agar mehrbāñ nahīñ

Bosa nahīñ na dījiye dushnām hī sahī

Aḳhir zabāñ to rakhte ho tum gar dahāñ nahīñ

Har-chand jāñ-gudāzi-e-qahr-o-itāb hai

Har-chand pusht-e-garmi-e-tāb-o-tavāñ nahīñ

Jaañ mutrib-e-tarāna-e-hal-mim-mazīd hai

Lab parda-sañj-e-zamzama-e-al-amāñ nahīñ

Khanjar se chiir siina agar dil na ho do-nīm

Dil meñ chhurī chubho mizha gar ḳhūñ-chakāñ nahīñ

Hai nañg-e-sīnā dil agar ātish-kada na ho

Hai ār-e-dil nafas agar āzar-fishāñ nahīñ

Nuqsāñ nahīñ junūñ meñ balā se ho ghar ḳharāb

Sau gaz zamīñ ke badle bayābāñ girāñ nahīñ

Kahte ho kyā likhā hai tirī sarnavisht meñ

Goyā jabīñ pe sajda-e-but kā nishāñ nahīñ

Paatā huuñ us se daad kuchh apne kalām kī

Rūhul-qudus agarche mirā ham-zabāñ nahīñ

Jaañ hai bahā-e-bosa vale kyuuñ kahe abhī

‘Ghālib’ ko jāntā hai ki vo nīm-jāñ nahīñ

Barg-e-hinā magar mizha-e-ḳhūñ-fishāñ nahīñ

Hujūm-e-ġham se yaañ tak sar-nigūnī mujh ko hāsil hai

Ki tār-e-dāman o tār-e-nazar meñ farq mushkil hai

Rafū-e-zaḳhm se matlab hai lazzat zaḳhm-e-sozan kī

Samajhiyo mat ki pās-e-dard se dīvāna ġhāfil hai

Vo gul jis gulsitāñ meñ jalva-farmā.ī kare ‘ġhālib’

ChaTaknā ġhuncha-e-gul kā sadā-e-ḳhanda-e-dil hai

Huā hai māne-e-āshiq-navāzī nāz-e-ḳhud-bīnī

Takalluf-bar-taraf ā.īna-e-tam.īz haa.el hai

Huī tāḳhīr to kuchh bā.is-e-tāḳhīr bhī thā

Aap aate the magar koī ināñ-gīr bhī thā

Tum se bejā hai mujhe apnī tabāhī kā gila

Us meñ kuchh shā.iba-e-ḳhūbi-e-taqdīr bhī thā

Tū mujhe bhuul gayā ho to patā batlā duuñ

Kabhī fitrāk meñ tere koī naḳhchīr bhī thā

Qaid meñ hai tire vahshī ko vahī zulf kī yaad

Haañ kuchh ik ranj-e-girāñ-bāri-e-zanjīr bhī thā

Bijlī ik kauñd ga.ī āñkhoñ ke aage to kyā

Baat karte ki maiñ lab-tishna-e-taqrīr bhī thā

Yūsuf us ko kahūñ aur kuchh na kahe ḳhair huī

Gar bigaḌ baiThe to maiñ lā.iq-e-tāzīr bhī thā

Dekh kar ġhair ko ho kyuuñ na kalejā ThanDā

Naala kartā thā vale tālib-e-tāsīr bhī thā

Peshe meñ aib nahīñ rakhiye na farhād ko naam

Ham hī āshufta-saroñ meñ vo javāñ-mīr bhī thā

Ham the marne ko khaḌe paas na aayā na sahī

Aḳhir us shoḳh ke tarkash meñ koī tiir bhī thā

PakḌe jaate haiñ farishtoñ ke likhe par nā-haq

Aadmī koī hamārā dam-e-tahrīr bhī thā

Reḳhte ke tumhīñ ustād nahīñ ho ‘Ghālib’

Kahte haiñ agle zamāne meñ koī ‘mīr’ bhī thā..