Category: Mirza Ghalib

Har qadam dūri-e-manzil hai numāyāñ mujh se

Merī raftār se bhāge hai bayābāñ mujh se

Dars-e-unvān-e-tamāshā ba-taġhāful ḳhush-tar

Hai nigah rishta-e-shīrāza-e-mizhgāñ mujh se

Vahshat-e-ātish-e-dil se shab-e-tanhā.ī meñ

Sūrat-e-dūd rahā saaya gurezāñ mujh se

Gham-e-ushshāq na ho sādgī-āmoz-e-butāñ

Kis qadar ḳhāna-e-ā.īna hai vīrāñ mujh se

Asar-e-ābla se jāda-e-sahrā-e-junūñ

Sūrat-e-rishta-e-gauhar hai charāġhāñ mujh se

Be-ḳhudī bistar-e-tamhīd-e-farāġhat ho jo

Pur hai saa.e kī tarah merā shabistāñ mujh se

Shauq-e-dīdār meñ gar tū mujhe gardan maare

Ho nigah misl-e-gul-e-shamā pareshāñ mujh se

Bekasī-hā-e-shab-e-hijr kī vahshat hai hai

Saaya ḳhurshīd-e-qayāmat meñ hai pinhāñ mujh se

Gardish-e-sāġhar-e-sad-jalva-e-rañgīñ tujh se

Aā.ina-dāri-e-yak-dīda-e-hairāñ mujh se

Nigah-e-garm se ek aag Tapaktī hai ‘asad’

Hai charāġhāñ ḳhas-o-ḳhāshāk-e-gulistāñ mujh se

Hairāñ huuñ dil ko ro.uuñ ki pīTūñ jigar ko maiñ

Maqdūr ho to saath rakhūñ nauhagar ko maiñ

ChhoḌā na rashk ne ki tire ghar kā naam luuñ

Har ik se pūchhtā huuñ ki jā.ūñ kidhar ko maiñ

Jaanā paḌā raqīb ke dar par hazār baar

Ai kaash jāntā na tire rah-guzar ko maiñ

Hai kyā jo kas ke bāñdhiye merī balā Dare

Kyā jāntā nahīñ huuñ tumhārī kamar ko maiñ

Lo vo bhī kahte haiñ ki ye be-nañg-o-nām hai

Ye jāntā agar to luTātā na ghar ko maiñ

Chaltā huuñ thoḌī duur har ik tez-rau ke saath

Pahchāntā nahīñ huuñ abhī rāhbar ko maiñ

Khvāhish ko ahmaqoñ ne parastish diyā qarār

Kyā pūjtā huuñ us but-e-bedād-gar ko maiñ

Phir be-ḳhudī meñ bhuul gayā rāh-e-kū-e-yār

Jaatā vagarna ek din apnī ḳhabar ko maiñ

Apne pe kar rahā huuñ qayās ahl-e-dahr kā

Samjhā huuñ dil-pazīr mata-e-hunar ko maiñ

‘Ghālib’ ḳhudā kare ki savār-e-samand-e-nāz

Dekhūñ alī bahādur-e-ālī-guhar ko maiñ…

Har ek baat pe kahte ho tum ki tū kyā hai

Tumhīñ kaho ki ye andāz-e-guftugū kyā hai

Na sho.ale meñ ye karishma na barq meñ ye adā

Koī batāo ki vo shoḳh-e-tund-ḳhū kyā hai

Ye rashk hai ki vo hotā hai ham-suḳhan tum se

Vagarna ḳhauf-e-bad-āmozi-e-adū kyā hai

Chipak rahā hai badan par lahū se pairāhan

Hamāre jaib ko ab hājat-e-rafū kyā hai

Jalā hai jism jahāñ dil bhī jal gayā hogā

Kuredte ho jo ab raakh justujū kyā hai

Ragoñ meñ dauḌte phirne ke ham nahīñ qaa.il

Jab aañkh hī se na Tapkā to phir lahū kyā hai

Vo chiiz jis ke liye ham ko ho bahisht aziiz

Sivā.e bāda-e-gulfām-e-mushk-bū kyā hai

Piyūñ sharāb agar ḳhum bhī dekh luuñ do-chār

Ye shīsha o qadah o kuuza o subū kyā hai

Rahī na tāqat-e-guftār aur agar ho bhī

To kis umiid pe kahiye ki aarzū kyā hai

Huā hai shah kā musāhib phire hai itrātā

Vagarna shahr meñ ‘ġhālib’ kī aabrū kyā hai…..

Hai bazm-e-butāñ meñ suḳhan āzurda-laboñ se

Tañg aa.e haiñ ham aise ḳhushāmad-talaboñ se

Hai daur-e-qadah vaj.h-e-pareshāni-e-sahbā

Yak-bār lagā do ḳhum-e-mai mere laboñ se

Rindān-e-dar-e-mai-kada gustāḳh haiñ zāhid

Zinhār na honā taraf in be-adaboñ se

Bedād-e-vafā dekh, ki jaatī rahī Aḳhir

Har-chand mirī jaan ko thā rabt laboñ se

Kyā pūchhe hai bar-ḳhud ġhalatī-hā-e-Azīzāñ

Khvārī ko bhī ik aar hai a.ālī-nasaboñ se

Hai bas-ki har ik un ke ishāre meñ nishāñ aur

Karte haiñ mohabbat to guzartā hai gumāñ aur

Yā-rab vo na samjhe haiñ na samjheñge mirī baat

De aur dil un ko jo na de mujh ko zabāñ aur

Abrū se hai kyā us nigah-e-nāz ko paivand

Hai tiir muqarrar magar is kī hai kamāñ aur

Tum shahr meñ ho to hameñ kyā ġham jab uTheñge

Le ā.eñge bāzār se jā kar Dil o jaañ aur

Har chand subuk-dast hue but-Shikanī meñ

Ham haiñ to abhī raah meñ hai sañg-e-girāñ aur

Hai ḳhūn-e-jigar josh meñ dil Khol ke rotā

Hote jo ka.ī dīda-e-ḳhūñ-nāba-fishāñ aur

Martā huuñ is āvāz pe har chand sar ud jaa.e

Jallād ko lekin vo kahe jaa.eñ ki haañ aur

Logoñ ko hai ḳhurshīd-e-jahāñ-tāb kā Dhokā

Har roz dikhātā huuñ maiñ ik dāġh-e-nihāñ aur

Letā na agar dil tumheñ detā koī dam chain

Kartā jo na martā koī din āh-o-Fuġhāñ Aur…

Paate nahīñ jab raah to chaḌh jaate haiñ naale

Ruktī hai mirī tab.a to hotī hai ravāñ aur

Haiñ aur bhī duniyā meñ suḳhan-var bahut achchhe

Kahte haiñ ki ‘ġhālib’ kā hai andāz-e-bayāñ aur…..

Hai ārmīdagī meñ nikohish bajā mujhe

Sub.h-e-vatan hai ḳhanda-e-dandāñ-numā mujhe

DhūñDe hai us muġhanni-e-ātish-nafas ko jī

Jis kī sadā ho jalva-e-barq-e-fanā mujhe

Mastāna tai karūñ huuñ rah-e-vādi-e-ḳhayāl

Tā bāz-gasht se na rahe mudda.ā mujhe

Kartā hai bas-ki baaġh meñ tū be-hijābiyāñ

Aane lagī hai nik.hat-e-gul se hayā mujhe

Khultā kisī pe kyuuñ mire dil kā mo.āmla

Sheroñ ke intiḳhāb ne rusvā kiyā mujhe

Hai pech-tāb rishta-e-sham-e-Sahar-gahī

Khajlat gudāzī-e-nafas-e-nā-Rasā mujhe

Gham nahīñ hotā hai āzādoñ ko besh az-yak-nafas

Barq se karte haiñ raushan sham-e-mātam-ḳhāna ham

Mahfileñ barham kare hai ganjifa-bāz-e-ḳhayāl

Haiñ varaq-gardāni-e-nairañg-e-yak-but-ḳhāna ham

Bāvajūd-e-yak-jahāñ hañgāma paidā.ī nahīñ

Haiñ charāġhān-e-shabistān-e-dil-e-parvāna ham

Zo.af se hai ne qanā.at se ye tark-e-justujū

Haiñ vabāl-e-takiya-gāh-e-himmat-e-mardāna ham

Dā.im-ul-habs us meñ haiñ lākhoñ tamannā.eñ ‘asad’

Jānte haiñ sīna-e-pur-ḳhūñ ko zindāñ-ḳhana ham

Gham-e-duniyā se gar paa.ī bhī fursat sar uThāne kī

Falak kā dekhnā taqrīb tere yaad aane kī

Khulegā kis tarah mazmūñ mire maktūb kā yā-rab

Qasam khaa.ī hai us kāfir ne kāġhaz ke jalāne kī

LipaTnā parniyāñ meñ shola-e-ātish kā pinhāñ hai

Vale mushkil hai hikmat dil meñ soz-e-ġham chhupāne kī

Unheñ manzūr apne zaḳhmiyoñ kā dekh aanā thā

Uthe the sair-e-gul ko dekhnā shoḳhī bahāne kī

Hamārī sādgī thī iltifāt-e-nāz par marnā

tirā aanā na thā zālim magar tamhīd jaane kī

Lakad kūb-e-havādis kā tahammul kar nahīñ saktī

Mirī tāqat ki zāmin thī butoñ kī naaz uThāne kī

Kahūñ kyā ḳhūbi-e-auzā-e-abnā-e-zamāñ ‘ġhālib’

Badī kī us ne jis se ham ne kī thī bār-hā nekī…

Ghar hamārā jo na rote bhī to vīrāñ hotā

Bahr gar bahr na hotā to bayābāñ hotā

Tañgi-e-dil kā gila kyā ye vo kāfir-dil hai

Ki agar tañg na hotā to pareshāñ hotā

Baad yak-umr-e-vara.a baar to detā baare

Kaash rizvāñ hī dar-e-yār kā darbāñ hotā

Ghar jab banā liyā tire dar par kahe Baġhair

Jānegā ab bhī tū na mirā ghar kahe Baġhair

Kahte haiñ jab rahī na mujhe tāqat-e-Suḳhan

Jānūñ kisī ke dil kī maiñ kyūñkar kahe Baġhair

Kaam us se aa paḌā hai ki jis kā jahān meñ

Leve na koī naam sitamgar kahe baġhair

Jī meñ hī kuchh nahīñ hai hamāre vagarna ham

Sar jaa.e yā rahe na raheñ par kahe Baġhair

Chhodūñgā maiñ na us but-e-Kāfir kā pūjnā

Chhode na ḳhalq go mujhe kāfar kahe baġhair

Maqsad hai nāz-o-ġhamza vale Guftugū meñ kaam

Chaltā nahīñ hai dashna-o-ḳhanjar kahe baġhair

Har chand ho mushāhida-e-haq kī Guftugū

Bantī nahīñ hai bāda-o-sāġhar kahe Baġhair

Bahrā huuñ maiñ to chāhiye duunā ho Iltifāt

Suntā nahīñ huuñ baat mukarrar kahe Baġhair

‘Ghālib’ na kar huzūr meñ tū baar baar arz

Zāhir hai terā haal sab un par kahe baġhair….