Shumār-e-sub.ha marġhūb-e-but-e-mushkil-pasand aayā
Tamāshā-e-ba-yak-kaf burdan-e-sad-dil-pasand aayā
Ba-faiz-e-be-dilī naumīdi-e-jāved āsāñ hai
Kushāyish ko hamārā uqda-e-mushkil-pasand aayā
Havā-e-sair-e-gul ā.īna-e-be-mehri-e-qātil
Ki andāz-e-ba-ḳhūñ-ġhaltīdan-e-bismil-pasand aayā
Ravānī-hā-e-mauj-e-ḳhūn-e-bismil se Tapaktā hai
Ki lutf-e-be-tahāshā-raftan-e-qātil-pasand aayā
‘Asad’ har jā suḳhan ne tarh-e-bāġh-e-tāza Daalī hai
Mujhe rañg-e-bahār-ījādi-e-be-dil-pasand aayā
Shikve ke naam se be-mehr ḳhafā hotā hai
Ye bhī mat kah ki jo kahiye to gila hotā hai
Pur huuñ maiñ shikve se yuuñ raag se jaise baajā
Ik zarā chheḌiye phir dekhiye kyā hotā hai
Go samajhtā nahīñ par husn-e-talāfī dekho
Shikva-e-jaur se sargarm-e-jafā hotā hai
Ishq kī raah meñ hai charḳh-e-makaukab kī vo chaal
Sust-rau jaise koī ābla-pā hotā hai
Kyuuñ na Thahreñ hadaf-e-nāvak-e-bedād ki ham
Aap uThā laate haiñ gar tiir ḳhatā hotā hai
Khuub thā pahle se hote jo ham apne bad-ḳhvāh
Ki bhalā chāhte haiñ aur burā hotā hai
Naala jaatā thā pare arsh se merā aur ab
Lab tak aatā hai jo aisā hī rasā hotā hai
Khāma merā ki vo hai bār-bud-e-bazm-e-suḳhan
Shaah kī mad.h meñ yuuñ naġhma-sarā hotā hai
Ai shahanshāh-e-kavākib sipah-o-mehr-e-alam
Tere ikrām kā haq kis se adā hotā hai
Saat aqlīm kā hāsil jo farāham kiije
To vo lashkar kā tire nāl-e-bahā hotā hai
Har mahīne meñ jo ye badar se hotā hai hilāl
Astāñ par tire mah nāsiya sā hotā hai
Maiñ jo gustāḳh huuñ ā.īn-e-ġhazal-ḳhvānī meñ
Ye bhī terā hī karam zauq-fazā hotā hai
Rakhiyo ‘ġhālib’ mujhe is talḳh-navā.ī meñ muaaf
Aaj kuchh dard mire dil meñ sivā hotā hai..
Jahāñ terā naqsh-e-qadam dekhte haiñ
Khayābāñ ḳhayābāñ iram dekhte haiñ
Dil-āshuftagāñ ḳhāl-e-kunj-e-dahan ke
Suvaidā meñ sair-e-adam dekhte haiñ
Tire sarv-qāmat se ik qadd-e-ādam
Qayāmat ke fitne ko kam dekhte haiñ
Tamāshā ki ai mahv-e-ā.īna-dārī
Tujhe kis tamannā se ham dekhte haiñ
Surāġh-e-taf-e-nāla le dāġh-e-dil se
Ki shab-rau kā naqsh-e-qadam dekhte haiñ
Banā kar faqīroñ kā ham bhes ‘ġhālib’
Tamāshā-e-ahl-e-karam dekhte haiñ
Kisū ko za-ḳhud rasta kam dekhte haiñ
Ki aahū ko pāband-e-ram dekhte haiñ
Khat-e-laḳht-e-dil yak-qalam dekhte haiñ
Mizha ko javāhar raqam dekhte haiñ
Jāda-e-rah ḳhur ko vaqt-e-shām hai tār-e-shuā.a
Charḳh vā kartā hai māh-e-nau se āġhosh-e-vidā.a
Sham.a se hai bazm-e-añgusht-e-tahayyur dar dahan
Sho.ala-e-āvāz-e-ḳhūbāñ par ba-hañgām-e-simā.a
Juuñ par-e-tā.ūs jauhar taḳhta mashq-e-rañg hai
Bas-ki hai vo qibla-e-ā.īna mahv-e-iḳhtirā.a
Ranjish-e-hairat-sarishtāñ sīna-sāfī peshkash
Jauhar-e-ā.īna hai yaañ gard-e-maidān-e-nazā.a
Chaar sū-e-dahr meñ bāzār-e-ġhaflat garm hai
Aql ke nuqsāñ se uThtā hai ḳhayāl-e-intifā.a
Ashnā ‘ġhālib’ nahīñ haiñ dard-e-dil ke āshnā
Varna kis ko mere afsāne kī tāb-e-istimā.a
Jab tak dahān-e-zaḳhm na paidā kare koī
Mushkil ki tujh se rāh-e-suḳhan vā kare koī
Aalam ġhubār-e-vahshat-e-majnūñ hai sar-ba-sar
Kab tak ḳhayāl-e-turra-e-lailā kare koī
Afsurdagī nahīñ tarab-inshā-e-iltifāt
Haañ dard ban ke dil meñ magar jā kare koī
Rone se ai nadīm malāmat na kar mujhe
Aḳhir kabhī to uqda-e-dil vā kare koī
Chāk-e-jigar se jab rah-e-pursish na vā huī
Kyā fā.eda ki jaib ko rusvā kare koī
Laḳht-e-jigar se hai rag-e-har-ḳhār shāḳh-e-gul
Tā chand bāġh-bāni-e-sahrā kare koī
Nākāmi-e-nigāh hai barq-e-nazārā-soz
tū vo nahīñ ki tujh ko tamāshā kare koī
Har sañg o ḳhisht hai sadaf-e-gauhar-e-shikast
Nuqsāñ nahīñ junūñ se jo saudā kare koī
Sar bar huī na vāda-e-sabr-āzmā se umr
Fursat kahāñ ki terī tamannā kare koī
hai vahshat-e-tabī.at-e-ījād yās-ḳhez
He dard vo nahīñ ki na paidā kare koī
Bekāri-e-junūñ ko hai sar pīTne kā shuġhl
Jab haath TuuT jaa.eñ to phir kyā kare koī
Husn-e-faroġh-e-shamma-e-suḳhan duur hai ‘asad’
Pahle Dil-e-gudāḳhta paidā kare koī
Vahshat kahāñ ki be-ḳhudī inshā kare koī
Hastī ko lafz-e-m.ani-e-anqā kare koī
Jo kuchh hai mahv-e-shoḳhi-e-abrū-e-yār hai
Añkhoñ ko rakh ke taaq pe dekhā kare koī
Arz-e-sarishk par hai fazā-e-zamāna tañg
Sahrā kahāñ ki dāvat-e-dariyā kare koī
Vo shoḳh apne husn pe maġhrūr hai ‘asad’
Dikhlā ke us ko aa.ina toḌā kare koī
Mirza Galid audios and videos |
|
Reading |
Audio | Video |
|---|---|---|
| Jab Tak Dahan-E-Zakhm Na Paida Kare Koi |  |
 |
| Tu Dost Kisu Ka Bhi Sitamgar Na Hua Tha | |
|
| Taghaful-Dost Hun Mera Dimagh-e-Ajz Aali Hai | |
|
| Ta Hum Ko Shikayat Ki Bhi Baqi Na Rahe Ja | |
|
Jab ba-taqrīb-e-safar yaar ne mahmil bāñdhā
Tapish-e-shauq ne har zarre pe ik dil bāñdhā
Ahl-e-bīnash ne ba-hairat-kada-e-shoḳhi-e-nāz
Jauhar-e-ā.ina ko tūti-e-bismil bāñdhā
Yaas o ummīd ne yak-arbada maidāñ māñgā
Ijz-e-himmat ne tilism-e-dil-e-sā.il bāñdhā
Na bañdhe tishnagi-e-zauq ke mazmūñ ‘ġhālib’
Garche dil khol ke dariyā ko bhī sāhil bāñdhā
Istilāhāt-e-asīrān-e-taġhāful mat pūchh
Jo girah aap na kholī use mushkil bāñdhā
Yaar ne tishnagī-e-shauq ke mazmūñ chāhe
Ham ne dil khol ke dariyā ko bhī sāhil bāñdhā
Tapish-e-ā.īna parvāz-e-tamannā laa.ī
nāma-e-shauq ba-hāl-e-dil-e-bismil bāñdhā
Niida tā-dil hai yak-ā.īna charāġhāñ kis ne
Khalvat-e-nāz pe pairāya-e-mahfil bāñdhā
Nā-umīdī ne ba-taqrīb-e-mazāmīn-e-ḳhumār
Kūcha-e-mauj ko ḳhamyāza-e-sāhil bāñdhā
Mutrib-e-dil ne mire tār-e-nafas se ‘Ghālib’
Saaz par rishta pa.e naġhma-e-‘bedil’ bāñdhā..
Ishrat-e-qatra hai dariyā meñ fanā ho jaanā
Dard kā had se guzarnā hai davā ho jaanā
Tujh se qismat meñ mirī sūrat-e-qufl-e-abjad
Thā likhā baat ke bante hī judā ho jaanā
Dil huā kasmakash-e-chāra-e-zehmat meñ tamām
Mit gayā ghisne meñ is uqde kā vā ho jaanā
Ab jafā se bhī haiñ mahrūm ham allāh allāh
Is qadar dushman-e-arbāb-e-vafā ho jaanā
Zo.af se girya mubaddal ba-dam-e-sard huā
Bāvar aayā hameñ paanī kā havā ho jaanā
Dil se miTnā tirī añgusht-e-hinā.ī kā ḳhayāl
Ho gayā gosht se nāḳhun kā judā ho jaanā
Hai mujhe abr-e-bahārī kā baras kar khulnā
Rote rote ġham-e-furqat meñ fanā ho jaanā
Gar nahīñ nik.hat-e-gul ko tire kūche kī havas
Kyuuñ hai gard-e-rah-e-jaulān-e-sabā ho jaanā
Baḳhshe hai jalva-e-gul zauq-e-tamāshā ‘ġhālib’
Chashm ko chāhiye har rañg meñ vā ho jaanā
Tā ki tujh par khule ejāz-e-havā-e-saiqal
Dekh barsāt meñ sabz aa.ine kā ho jaanā..
Ishq tāsīr se naumīd nahīñ
Jāñ-sapārī shajar-e-bīd nahīñ
Saltanat dast-ba-dast aa.ī hai
Jām-e-mai ḳhātam-e-jamshed nahīñ
Hai tajallī tirī sāmān-e-vajūd
Zarra be-partav-e-ḳhurshīd nahīñ
Rāz-e-māshūq na rusvā ho jaa.e
Varna mar jaane meñ kuchh bhed nahīñ
Gardish-e-rañg-e-tarab se Dar hai
Gham-e-mahrūmi-e-jāved nahīñ
Kahte haiñ jiite haiñ ummīd pe log
Ham ko jiine kī bhī ummīd nahīñ…
Ishq mujh ko nahīñ vahshat hī sahī
Merī vahshat tirī shohrat hī sahī
Qat.a kiije na ta.alluq ham se
Kuchh nahīñ hai to adāvat hī sahī
Mere hone meñ hai kyā rusvā.ī
Ai vo majlis nahīñ ḳhalvat hī sahī
Ham bhī dushman to nahīñ haiñ apne
Ghair ko tujh se mohabbat hī sahī
Apnī hastī hī se ho jo kuchh ho
Agahī gar nahīñ ġhaflat hī sahī
Umr har-chand ki hai barq-e-ḳhirām
Dil ke ḳhuuñ karne kī fursat hī sahī
Ham koī tark-e-vafā karte haiñ
Na sahī ishq musībat hī sahī
Kuchh to de ai falak-e-nā-insāf
Aah o fariyād kī ruḳhsat hī sahī
Ham bhī taslīm kī ḳhū Dāleñge
Be-niyāzī tirī aadat hī sahī
Yaar se chheḌ chalī jaa.e ‘asad’
Gar nahīñ vasl to hasrat hī sahī..
Ibn-e-maryam huā kare koī
Mere dukh kī davā kare koī
Shar.a o aa.iin par madār sahī
Aise qātil kā kyā kare koī
Chaal jaise kaḌī kamān kā tiir
Dil meñ aise ke jā kare koī
Baat par vaañ zabān kaTtī hai
Vo kaheñ aur sunā kare koī
Bak rahā huuñ junūñ meñ kyā kyā kuchh
Kuchh na samjhe ḳhudā kare koī
Na suno gar burā kahe koī
Na kaho gar burā kare koī
Rok lo gar ġhalat chale koī
Baḳhsh do gar ḳhatā kare koī
Kaun hai jo nahīñ hai hājat-mand
Kis kī hājat ravā kare koī
Kyā kiyā ḳhizr ne sikandar se
Ab kise rahnumā kare koī
Jab tavaqqo.a hī uTh ga.ī ‘ġhālib’
Kyuuñ kisī kā gila kare koī..