Author: admin

Ab ke baras dastūr-e-sitam meñ kyā kyā baab īzād hue

Jo qātil the maqtūl hue jo said the ab sayyād hue

Pahle bhī ḳhizāñ meñ baaġh ujḌe par yuuñ nahīñ jaise ab ke baras

Saare buuTe patta patta ravish ravish barbād hue

Pahle bhī tavāf-e-sham-e-vafā thī rasm mohabbat vāloñ kī

Ham tum se pahle bhī yahāñ ‘mansūr’ hue ‘farhād’ hue

Ik gul ke murjhāne par kyā gulshan meñ kohrām machā

Ik chehra kumhlā jaane se kitne dil nāshād hue

‘Faiz’ na ham ‘yūsuf’ na koī ‘yāqūb’ jo ham ko yaad kare

Apnī kyā kan.āñ meñ rahe yā misr meñ jā ābād hue

Ab jo koī pūchhe bhī to us se kyā sharh-e-hālāt kareñ

Dil Thahre to dard sunā.eñ dard thame to baat kareñ

Shaam huī phir josh-e-qadah ne bazm-e-harīfāñ raushan kī

Ghar ko aag lagā.eñ ham bhī raushan apnī raat kareñ

Qatl-e-dil-o-jāñ apne sar hai apnā lahū apnī gardan pe

Mohr-ba-lab baiThe haiñ kis kā shikva kis ke saath kareñ

Hijr meñ shab bhar dard-o-talab ke chāñd sitāre saath rahe

Sub.h kī vīrānī meñ yaaro kaise basar auqāt kareñ

”Aap kī yaad aatī rahī raat bhar”

Chāñdnī dil dukhātī rahī raat bhar

Gaah jaltī huī gaah bujhtī huī

Sham-e-ġham Jhilmilātī rahī raat bhar

Koī ḳhushbū badaltī rahī pairahan

Koī tasvīr gaatī rahī raat bhar

Phir sabā sāya-e-shāḳh-e-gul ke tale

Koī qissa sunātī rahī raat bhar

Jo na aayā use koī Zanjīr-e-dar

Har sadā par bulātī rahī raat bhar

Ek ummīd se dil Bahaltā rahā

Ik tamannā satātī rahī Raat Bhar

Aaj yuuñ mauj-dar-mauj ġham tham gayā is tarah Gam-zadoñ ko qarār aa gayā

Jaise ḳhush-bū-e-zulf-e-bahār aa ga.ī jaise paiġhām-e-dīdār-e-yār aa gayā

Jis kī dīd-o-talab vahm samjhe the ham rū-ba-rū phir sar-e-Rahguzār aa gayā

Sub.h-e-fardā ko phir dil tarasne lagā umr-e-rafta tirā e’tibār aa gayā

Rut badalne lagī rañg-e-dil dekhnā rañg-e-gulshan se ab haal khultā nahīñ

Zaḳhm chhalkā koī yā koī gul khilā ashk umDe ki abr-e-bahār aa gayā

Khūn-e-ushshāq se jaam bharne lage dil sulagne lage Daaġh jalne lage

Mahfil-e-dard phir rañg par aa ga.ī phir Shab-e-Arzū par nikhār aa gayā

Sarfaroshī ke andāz badle ga.e dāvat-e-qatl par maqtal-e-shahr meñ

Daal kar koī gardan meñ tauq aa gayā laad kar koī kāñdhe pe daar aa gayā

‘Faiz’ kyā jāniye yaar kis aas par muntazir haiñ ki lā.egā koī ḳhabar

Mai-kashoñ par huā Mohtasib mehrbāñ dil-Figāroñ pe qātil ko pyaar aa gayā