Author: admin

Gham-e-duniyā se gar paa.ī bhī fursat sar uThāne kī

Falak kā dekhnā taqrīb tere yaad aane kī

Khulegā kis tarah mazmūñ mire maktūb kā yā-rab

Qasam khaa.ī hai us kāfir ne kāġhaz ke jalāne kī

LipaTnā parniyāñ meñ shola-e-ātish kā pinhāñ hai

Vale mushkil hai hikmat dil meñ soz-e-ġham chhupāne kī

Unheñ manzūr apne zaḳhmiyoñ kā dekh aanā thā

Uthe the sair-e-gul ko dekhnā shoḳhī bahāne kī

Hamārī sādgī thī iltifāt-e-nāz par marnā

tirā aanā na thā zālim magar tamhīd jaane kī

Lakad kūb-e-havādis kā tahammul kar nahīñ saktī

Mirī tāqat ki zāmin thī butoñ kī naaz uThāne kī

Kahūñ kyā ḳhūbi-e-auzā-e-abnā-e-zamāñ ‘ġhālib’

Badī kī us ne jis se ham ne kī thī bār-hā nekī…

Ghar hamārā jo na rote bhī to vīrāñ hotā

Bahr gar bahr na hotā to bayābāñ hotā

Tañgi-e-dil kā gila kyā ye vo kāfir-dil hai

Ki agar tañg na hotā to pareshāñ hotā

Baad yak-umr-e-vara.a baar to detā baare

Kaash rizvāñ hī dar-e-yār kā darbāñ hotā

Ghar jab banā liyā tire dar par kahe Baġhair

Jānegā ab bhī tū na mirā ghar kahe Baġhair

Kahte haiñ jab rahī na mujhe tāqat-e-Suḳhan

Jānūñ kisī ke dil kī maiñ kyūñkar kahe Baġhair

Kaam us se aa paḌā hai ki jis kā jahān meñ

Leve na koī naam sitamgar kahe baġhair

Jī meñ hī kuchh nahīñ hai hamāre vagarna ham

Sar jaa.e yā rahe na raheñ par kahe Baġhair

Chhodūñgā maiñ na us but-e-Kāfir kā pūjnā

Chhode na ḳhalq go mujhe kāfar kahe baġhair

Maqsad hai nāz-o-ġhamza vale Guftugū meñ kaam

Chaltā nahīñ hai dashna-o-ḳhanjar kahe baġhair

Har chand ho mushāhida-e-haq kī Guftugū

Bantī nahīñ hai bāda-o-sāġhar kahe Baġhair

Bahrā huuñ maiñ to chāhiye duunā ho Iltifāt

Suntā nahīñ huuñ baat mukarrar kahe Baġhair

‘Ghālib’ na kar huzūr meñ tū baar baar arz

Zāhir hai terā haal sab un par kahe baġhair….

Ghuncha-e-nā-shagufta ko duur se mat dikhā ki yuuñ

Bose ko pūchhtā huuñ maiñ muñh se mujhe batā ki yuuñ

Pursish-e-tarz-e-dilbarī kījiye kyā ki bin kahe

Us ke har ek ishāre se nikle hai ye adā ki yuuñ

Raat ke vaqt mai piye saath raqīb ko liye

Aa.e vo yaañ ḳhudā kare par na kare ḳhudā ki yuuñ

Ghair se raat kyā banī ye jo kahā to dekhiye

Sāmne aan baiThnā aur ye dekhnā ki yuuñ

Bazm meñ us ke rū-ba-rū kyuuñ na ḳhamosh baiThiye

Us kī to ḳhāmushī meñ bhī hai yahī mudda.ā ki yuuñ

Maiñ ne kahā ki bazm-e-nāz chāhiye ġhair se tihī

Sun ke sitam-zarīf ne mujh ko uthā diyā ki yuuñ

Mujh se kahā jo yaar ne jaate haiñ hosh kis tarah

Dekh ke merī be-ḳhudī chalne lagī havā ki yuuñ

Kab mujhe kū-e-yār meñ rahne kī vaz.a yaad thī

A.ina-dār ban ga.ī hairat-e-naqsh-e-pā ki yuuñ

Gar tire dil meñ ho ḳhayāl vasl meñ shauq kā zavāl

Mauj muhīt-e-āb meñ maare hai dast-o-pā ki yuuñ

Jo ye kahe ki reḳhta kyūñke ho rashk-e-fārsī

Gufta-e-‘ġhālib’ ek baar paḌh ke use sunā ki yuuñ

Gulshan ko tirī sohbat az-bas-ki Khush aa.ī hai

Har ġhunche kā gul honā āġhosh-Kushā.ī hai

Vaañ kañgar-e-istiġhnā har-dam hai Bulandī par

Yaañ naale ko aur ulTā dāvā-e-rasā.ī hai

Az-bas-ki sikhātā hai ġham zabt ke Andāze

Jo daaġh nazar aayā ik chasm-numāī Hai

Gila hai shauq ko dil meñ bhī Tañgi-e-jā kā

Guhar meñ mahv huā iztirāb dariyā kā

Ye jāntā huuñ ki tū aur pāsuḳh-e-Maktūb

Magar sitam-zada huuñ zauq-e-Khāma-farsā kā

Hinā-e-pā-e-ḳhizāñ hai bahār agar hai yahī

Davām-e-kulfat-e-ḳhātir hai aish Duniyā kā

Mujhe dimāġh nahīñ ḳhanda-hā-e-Bejā kā

Kare hai har-bun-e-mū kaam Chashm-e-bīnā kā

Dil us ko pahle hī nāz-o-adā se de baithe

Hameñ dimāġh kahāñ husn ke taqāzā kā

Na kah ki girya ba-miqdār-e-hasrat-e-dil hai

Mirī nigāh meñ hai jam-o-ḳharch dariyā kā

Falak ko dekh ke kartā huuñ us ko yaad ‘asad’

Jafā meñ us kī hai andāz kār-farmā kā

Gham khāne meñ buudā dil-e-Nākām bahut hai

Ye rañj ki kam hai mai-e-gulfām bahut hai

Kahte hue saaqī se hayā aatī hai varna

Hai yuuñ ki mujhe durd-e-tah-e-Jām bahut hai

Ne tiir kamāñ meñ hai na sayād kamīñ meñ

Goshe meñ qafas ke mujhe Arām bahut hai

Kyā zohd ko mānūñ ki na ho garche Riyāī

Pādāsh-e-amal kī tama-e-ḳhām bahut hai

Haiñ ahl-e-ḳhirad kis ravish-e-ḳhās pe Nāzāñ

Pābastagi-e-rasm-o-rāh-e-ām bahut hai

Zamzam hī pe chhoḌo mujhe kyā Tauf-e-haram se

Alūdā-ba-mai jāma-e-ehrām bahut hai

Hai qahr gar ab bhī na bane baat ki un ko

Inkār nahīñ aur mujhe ibrām bahut hai

Khuuñ ho ke jigar aañkh se Tapkā nahīñ ai Marg

Rahne de mujhe yaañ ki abhī kaam bahut hai

Hogā koī aisā bhī ki ‘ġhālib’ ko na jaane

Shāyar to vo achchhā hai par Badnām bahut hai