Dua mein teri hasi maangi aur kurbat mein tujhe maanga,
Is se zyada maine khuda se kuch nahi chaha.
Category: Shayar
-
Faqih-e-Shahr Ki Majlis Se Kuchh Bhala Na Hua
FaqIh-e-shahr kI majlis se kuchh bhala na hua
ki us se mil ke mizaj aur kafirana hua
Abhi abhi vo mila tha hazar baten kiin
Abhi abhi vo gaya hai magar zamana hua
Vo raat bhuul chuko vo suḳhan na doharao
Vo raat ḳhvab hui vo suḳhan fasana hua
Kuchh ab ke aise kade the firaq ke mausam
Tiri hi baat nahin main bhi kya se kya na hua
Hujum aisa ki rahen nazar nahin atin
Nasib aisa ki ab tak to qafila na hua
Shahid-e-shab faqat ahmad-‘farāz’ hi to nahin
Ki jo charaġh-ba-kaf tha vahi nishana hua
-
Dukh Fasana Nahin Ki Tujhse Kahen
Dukh fasana nahin ki tujh se kahen
Dil bhi maana nahin ki tujh se kahen
Aaj tak apni bekali ka sabab
Khud bhi jaana nahin ki tujh se kahen
Be-tarah hal-e-dil hai aur tujh se
Dostana nahin ki tujh se kahen
Ek tu harf-e-ashna tha magar
Ab zamana nahin ki tujh se kahen
Qasida ham faqir logon ka
Ik Thikana nahin ki tujh se kahen
Ai ḳhuda dard-e-dil hai baḳhshish-e-dost
Ab-o-dana nahin ki tujh se kahen
Ab to apna bhi us gali men ‘farāz’
Aana jaana nahin ki tujh se kahen
-
Bada Ehsan Hum Farma Rahe Hain
Bada ehsan ham farma rahe hain
Ki un ke ḳhat unhen lauta rahe hain
Nahin tark-e-mohabbat par vo raazi
Qayamat hai ki ham samjha rahe hain
Yaqin ka rasta tai karne vaale
Bahut tezi se vapas aa rahe hain
Ye mat bhulo ki ye lamhat ham ko
Bichhadne ke liye milva rahe hain
Ta ajjub hai ki ishq-o-ashiqi se
Abhi kuchh log dhoka kha rahe hain
Tumhen chahenge jab chhin jaogi tum
Abhi ham tum ko arzan pa rahe hain
Kisi surat unhen nafrat ho ham se
Ham apne aib ḳhud ginva rahe hain
Vo pagal mast hai apni vafa men
Miri ankhon men aansu aa rahe hain
Dalilon se use qaail kiya tha
Dalilen de ke ab pachhta rahe hain
Tiri banhon se hijrat karne vaale
Nae mahaul men ghabra rahe hain
Ye jazb-e-ishq hai ya jazba-e-raham
Tire aansu mujhe rulva rahe hain
Ajab kuchh rabt hai tum se ki tum ko
Ham apna jaan kar Thukra rahe hain
Vafa ki yadgaren tak na hongi
Miri jaan bas koi din ja rahe hain
-
Baat Koi Ummid Ki Mujhse Nahin Kahi Gai
Baat koi umiid ki mujh se nahin kahi gai
So mire ḳhvab bhi gae so meri niind bhi gai
Dil ka tha ek muddaa jis ne tabah kar diya
Dil men thi ek hi to baat vo jo faqat sahi gai
Janiye kya talash thi ‘Jaun’ mire vajud men
Jis ko main Dhundhta gaya jo mujhe Dhundhti gai
Ek ḳhushi ka haal hai ḳhush-suḳhanan ke darmiyan
Izzat-e-shaeqin-e-ġham thi jo rahi-sahi gai
Bud-o-nabud ki tamiz ek azaab thi ki thi
Yaani tamam zindagi dhund men Dubti gai
Us ke jamal ka tha din mera vajud aur phir
Subah se dhuup bhi gai raat se chandni gai
Jab main tha shahr zaat ka tha mira har-nafas azaab
Phir main vahan ka tha jahan halat-e-zat bhi gai
Gard-fashan huun dasht men sina-zanan huun shahar men
Thi jo saba-e-samt-e-dil jaane kahan chali gai
Tum ne bahut sharab pi us ka sabhi ko dukh hai ‘jaun’
Aur jo dukh hai vo ye hai tum ko sharab pi gai
-
Apni Manzil Ka Rasta Bhejo
Apni manzil ka rasta bhejo
Jaan ham ko vahan bula bhejo
Kya hamara nahin raha savan
Zulf yaan bhi koi ghata bhejo
Nai kaliyan jo ab khili hain vahan
Un ki ḳhushbu ko ik zara bhejo
Ham na jiite hain aur na marte hain
Dard bhejo na tum dava bhejo
Dhuul udti hai jo us angan men
Us ko bhejo saba saba bhejo
Ai faqiro gali ke us gul ki
Tum hamen apni ḳhak-e-pa bhejo
Shafaq-e-sham-e-hijr ke hathon
Apni utri hui qaba bhejo
Kuchh to rishta hai tum se kam-baḳhton
Kuchh nahin koi bad-dua bhejo
-
Apne Sab Yar Kaam Kar Rahe Hain
Apne Sab yaar kaam kar rahe hain
Aur ham hain ki naam kar rahe hain
Teġh-bazi ka shauq apni jagah
Aap to qatl-e-am kar rahe hain
Dad-o-tahsin ka ye shor hai kyuun
Ham to ḳhud se kalam kar rahe hain
Ham hain masruf-e-intizam magar
Jaane kya intizam kar rahe hain
Hai vo bechargi ka haal ki ham
Har kisi ko salam kar rahe hain
Ek qattala chahiye ham ko
Ham ye ealan-e-am kar rahe hain
Kya bhala saġhar-e-sifal ki ham
Nāf-pyale ko jaam kar rahe hain
Ham to aae the arz-e-matlab ko
Aur vo ehtiram kar rahe hain
Na uthe aah ka dhuan bhi ki vo
Ku-e-dil men ḳhiram kar rahe hain
Us ke honton pe rakh ke hont apne
Baat hi ham tamam kar rahe hain
Ham ajab hain ki us ke kuche men
Be-sabab dhum-dham kar rahe hain
-
Apna Khaka Lagta Hun
Apna ḳhaka lagta huun
Ek tamasha lagta huun
ainon ko zang laga
Ab main kaisa lagta huun
Ab main koi shaḳhs nahin
Us ka saaya lagta huun
Saare rishte tishna hain
Kya main dariya lagta huun
Us se gale mil kar ḳhud ko
Tanha tanha lagta huun
Khud ko main sab ankhon men
Dhundla dhundla lagta huun
Main har lamha is ghar se
Jaane vaala lagta huun
Kya hue vo sab log ki main
Suuna suuna lagta huun
Maslahat is men kya hai meri
Tuuta phuta lagta huun
Kya tum ko is haal men bhi
Main duniya ka lagta huun
Kab ka rogi huun vaise
Shahr-e-masiha lagta huuñ
Mera taalu tar kar do
Sach-much pyasa lagta huun
Mujh se kama lo kuchh paise
Zinda murda lagta huun
Main ne sahe hain makr apne
Ab bechara lagta huun
-
Ajab Haalat Hamari Ho Gai Hai
Ajab halat hamari ho gai hai
Ye duniya ab tumhārī ho ga.ī hai
Suḳhan mera udasi hai sar-e-sham
Jo ḳhamoshi pe taari ho gai hai
Bahut hi ḳhush hai dil apne kiye par
Zamane-bhar men ḳhvari ho gai hai
Vo nazuk-lab hai ab jaane hi vaala
Miri avaz bhari ho gai hai
Dil ab duniya pe la.anat kar ki is ki
Bahut ḳhidmat-guzari ho gai hai
yaqin maazur hai ab aur guman bhi
Badi be-roz-gari ho gai hai
Vo ik bad-e-shumali-rang jo thi
Shamim us ki savari ho gai hai
Mire paas aa ke ḳhanjar bhonk de tu
Bahut neza-guzari ho gai hai
-
Ajab Ek Taur Hai Jo Hum Sitam Ijad Rakhen
Ajab ik taur hai jo ham sitam ijad rakhen
Ki na us shaḳhs ko bhulen na use yaad rakhen
Ahd is kucha-e-dil se hai so us kuche men
Hai koi apni jagah ham jise barbad rakhen
Kya kahen kitne hi nukte hain jo barte na gae
Khush-badan ishq karen aur hamen ustad rakhen
Be-sutun ik navahi men hai shahr-e-dil ki
Tesha in.aam karen aur koi farhad rakhen
Ashiyana koi apna nahin par shauq ye hai
Ik qafas laa.en kahin se koi sayyad rakhen
Ham ko anfas ki apne hai imarat karni
Is imarat ki labon par tire buniyad rakhen