Author: admin

Ibn-e-maryam huā kare koī

Mere dukh kī davā kare koī

Shar.a o aa.iin par madār sahī

Aise qātil kā kyā kare koī

Chaal jaise kaḌī kamān kā tiir

Dil meñ aise ke jā kare koī

Baat par vaañ zabān kaTtī hai

Vo kaheñ aur sunā kare koī

Bak rahā huuñ junūñ meñ kyā kyā kuchh

Kuchh na samjhe ḳhudā kare koī

Na suno gar burā kahe koī

Na kaho gar burā kare koī

Rok lo gar ġhalat chale koī

Baḳhsh do gar ḳhatā kare koī

Kaun hai jo nahīñ hai hājat-mand

Kis kī hājat ravā kare koī

Kyā kiyā ḳhizr ne sikandar se

Ab kise rahnumā kare koī

Jab tavaqqo.a hī uTh ga.ī ‘ġhālib’

Kyuuñ kisī kā gila kare koī..

Hāsil se haath dho baiTh ai ārzū-ḳhirāmī

Dil josh-e-girya meñ hai Duubī huī asāmī

Us sham.a kī tarah se jis ko koī bujhā de

Maiñ bhī jale-huoñ meñ huuñ dāġh-e-nā-tamāmī

Karte ho shikva kis kā tum aur bevafāī

Sar pīTte haiñ apnā ham aur nek-nāmī

Hai kis qadar halāk-e-fareb-e-vafā-e-gul

Bulbul ke kārobār pe haiñ ḳhanda-hā-e-gul

Azādī-e-nasīm mubārak ki har taraf

TuuTe paḌe haiñ halqa-e-dām-e-havā-e-gul

Jo thā so mauj-e-rañg ke dhoke meñ mar gayā

Ai vaa.e nāla-e-lab-e-ḳhūnīñ-navā-e-gul

Khush-hāl us harīf-e-siyah-mast kā ki jo

Rakhtā ho misl-e-sāya-e-gul sar-ba-pā-e-gul

Ijād kartī hai use tere liye bahār

Merā raqīb hai nafas-e-itr-sā-e-gul

Sharminda rakhte haiñ mujhe bād-e-bahār se

Mīnā-e-be-sharāb o dil-e-be-havā-e-gul

Satvat se tere jalva-e-husn-e-ġhuyūr kī

Khuuñ hai mirī nigāh meñ rañg-e-adā-e-gul

Tere hī jalve kā hai ye dhokā ki aaj tak

Be-iḳhtiyār dauḌe hai gul dar-qafā-e-gul

‘Ghālib’ mujhe hai us se ham-āġhoshī aarzū

Jis kā ḳhayāl hai gul-e-jeb-e-qabā-e-gul

Dīvānagāñ kā chāra faroġh-e-bahār hai

Hai shāḳh-e-gul meñ panja-e-ḳhūbāñ bajā.e gul

Hai sabza-zār har dar-o-dīvār-e-ġham-kada

Jis kī bahār ye ho phir us kī ḳhizāñ na pūchh

Nā-chār bekasī kī bhī hasrat uThā.iye

Dushvāri-e-rah o sitam-e-ham-rahāñ na pūchh

Parvāz-e-yak-tap-e-ġham-e-tasḳhīr-e-nāla hai

Garmī-e-nabz-e-nabz-e-ḳhār-o-ḳhas-e-āshiyāñ na pūchh

Husn ġhamze kī kashākash se chhuTā mere ba.ad

Baare ārām se haiñ ahl-e-jafā mere ba.ad

Mansab-e-sheftagī ke koī qābil na rahā

Huī māzūli-e-andāz-o-adā mere ba.ad

Sham.a bujhtī hai to us meñ se dhuāñ uThtā hai

Sho.ala-e-ishq siyah-posh huā mere ba.ad

Khuuñ hai dil ḳhaak meñ ahvāl-e-butāñ par ya.anī

Un ke nāḳhun hue mohatāj-e-hinā mere ba.ad

Dar-ḳhur-e-arz nahīñ jauhar-e-bedād ko jā

Nigah-e-nāz hai surme se ḳhafā mere ba.ad

Hai junūñ ahl-e-junūñ ke liye āġhosh-e-vidā.a

Chaak hotā hai garebāñ se judā mere ba.ad

Kaun hotā hai harīf-e-mai-e-mard-afgan-e-ishq

Hai mukarrar lab-e-sāqī pe salā mere ba.ad

Gham se martā huuñ ki itnā nahīñ duniyā meñ koī

Ki kare tāzīyat-e-mehr-o-vafā mere ba.ad

Aa.e hai bekasī-e-ishq pe ronā ‘ġhālib’

Kis ke ghar jā.egā sailāb-e-balā mere ba.ad

Thī nigah merī nihāñ-ḳhāna-e-dil kī naqqāb

Be-ḳhatar jiite haiñ arbāb-e-riyā mere ba.ad

Huzūr-e-shāh meñ ahl-e-suḳhan kī āzmā.ish hai

Chaman meñ ḳhush-navāyan-e-chaman kī āzmā.ish hai

Qad o gesū meñ qais o kohkan kī āzmā.ish hai

Jahāñ ham haiñ vahāñ dār-o-rasan kī āzmā.ish hai

Rareñge kohkan ke hausle kā imtihān āḳhir

Abhī us ḳhasta ke nerve tan kī āzmā.ish hai

Nasīm-e-misr ko kyā pīr-e-kan.āñ kī havā-ḳhvāhī

Use yūsuf kī bū-e-pairahan kī āzmā.ish hai

Vo aayā bazm meñ dekho na kahiyo phir ki ġhāfil the

Shakeb-o-sabr-e-ahl-e-anjuman kī āzmā.ish hai

Rahe dil hī meñ tiir achchhā jigar ke paar ho behtar

Gharaz shust-e-but-e-nāvak-fagan kī āzmā.ish hai

Nahīñ kuchh sub.ha-o-zunnār ke phande meñ gīrā.ī

Vafādārī meñ shaiḳh o barhaman kī āzmā.ish hai

PaḌā rah ai dil-e-vābasta betābī se kyā hāsil

Magar phir tāb-e-zulf-e-pur-shikan kī āzmā.ish hai

Rag-o-pai meñ jab utre zahr-e-ġham tab dekhiye kyā ho

Abhī to talḳhī-e-kām-o-dahan kī āzmā.ish hai

vo āveñge mire ghar va.ada kaisā dekhnā ‘Ghālib’

Na.e fitnoñ meñ ab charḳh-e-kuhan kī āzmā.ish hai

Husn-e-mah garche ba-hañgām-e-kamāl achchhā hai

Us se merā mah-e-ḳhurshīd-jamāl achchhā hai

Bosa dete nahīñ aur dil pe hai har lahza nigāh

Jī meñ kahte haiñ ki muft aa.e to maal achchhā hai

Aur bāzār se le aa.e agar TuuT gayā

Sāġhar-e-jam se mirā jām-e-sifāl achchhā hai

Be-talab deñ to mazā us meñ sivā miltā hai

Vo gadā jis ko na ho ḳhū-e-savāl achchhā hai

Un ke dekhe se jo aa jaatī hai muñh par raunaq

Vo samajhte haiñ ki bīmār kā haal achchhā hai

Dekhiye paate haiñ ushshāq butoñ se kyā faiz

Ik barhaman ne kahā hai ki ye saal achchhā hai

Ham-suḳhan tesha ne farhād ko shīrīñ se kiyā

Jis tarah kā ki kisī meñ ho kamāl achchhā hai

Qatra dariyā meñ jo mil jaa.e to dariyā ho jaa.e

Kaam achchhā hai vo jis kā ki ma.aal achchhā hai

Khizr-sultāñ ko rakhe ḳhāliq-e-akbar sarsabz

Shaah ke baaġh meñ ye taaza nihāl achchhā hai

Ham ko ma.alūm hai jannat kī haqīqat lekin

Dil ke ḳhush rakhne ko ‘ġhālib’ ye ḳhayāl achchhā hai

Hujūm-e-nāla hairat ājiz-e-arz yak-afġhāñ hai

Khamoshī resha-e-sad-nīstāñ se ḳhas-ba-dandāñ hai

Takalluf-bar-taraf hai jāñ-sitāñ-tar lutf-e-bad-ḳhūyāñ

Nigāh-e-be-hijāb-e-nāz teġh-e-tez-e-uryāñ hai

Huī ye kasrat-e-ġham se talaf kaifiyat-e-shādī

Ki sub.h-e-īd mujh ko bad-tar az-chāk-e-garebāñ hai

Dil o diiñ naqd lā saaqī se gar saudā kiyā chāhe

Ki us bāzār meñ sāġhar matā-e-dast-gardāñ hai

Gham āġhosh-e-balā meñ parvarish detā hai āshiq ko

Charāġh-e-raushan apnā qulzum-e-sarsar kā marjāñ hai